[东方报]世界盃：攻力深厚硬撼比利時 西班牙出招半Ｗ[07-10]

世盃8強西班牙火併比利時！兩隊都擅於踢技術型進攻足球，但論級數「狂牛兵團」高一班，所以呈現格食格局面；雙方近5次交鋒，西班牙獲得全勝，相信今場可以速破比利時脆弱防線。參考西班牙近4場有3次上半場領先，直取半場主勝。（Now 618及616周六凌晨3時直播）

「狂牛兵團」西班牙今屆首場分組賽遭佛得角守和0比0，一度被批評欠缺霸氣，但經過多場賽事後，已證明佛得角確係有料到，強如上屆冠軍阿根廷喺32強都未能於法定時間擊敗呢支非洲奇兵，因此西班牙當時失分情有可原。加上拉明耶馬該仗剛傷愈後備上陣，難免令球隊攻力受削，隨住呢位「新世代球王」重拾勇態，「狂牛兵團」成績亦直線上升，近4仗全勝之餘兼力保不失，其中3場上半場取得領先優勢，可見只要西班牙先入波，對手就難以扳平。

西班牙鋒線上除咗拉明耶馬表現活躍之外，另一鋒將奧耶沙巴爾演出亦可圈可點，今屆賽事佢把握能力明顯大幅提升，至今已有4球進帳及交出1次助攻。翼鋒阿歷斯巴爾拿踢法亦極具侵略性，為球隊提供唔少側擊威脅，連帶中場米基爾馬連奴都走出傷患陰霾，上仗更加入波一箭江定山，成功將葡萄牙淘汰，「狂牛兵團」進攻點夠多，勢必令比利時防不勝防。

歐洲紅魔防線不穩
另邊廂，比利時上場16強大勝東道主之一嘅美國，好大程度上因為美國總統特朗普向國際足協施壓，令原本應該停賽嘅科連拿巴洛根獲緩刑上陣，激起呢支「歐洲紅魔」怒火，大踢爭氣波擊敗美國。撇開呢項因素，其實比利時今屆表現只屬一般，分組賽對住埃及同伊朗都贏唔到，32強遇上塞內加爾更一度落後2球，今屆5戰有4場失波，近2仗更加上半場已失守，防線甚為不穩，面對攻力強勁嘅西班牙，恐怕半場都頂唔住。