[东方报]世界盃：3大風頭躉齊齊搶fo[07-05]

世盃淘汰賽逐漸進入高潮，今晚16強有3大「風頭躉」登場，港人最愛英格蘭挑戰墨西哥地獄主場，危機四伏！5屆冠軍巴西就會同歐洲新興力量挪威交鋒，一眾頂尖巨星正面廝殺，球迷點可以錯過！

巴西撻着半場大立威
世盃16強再有神鋒大鬥法！愈戰愈勇嘅「足球王國」巴西，同北歐童話球隊挪威爭逐8強席位。兩隊今屆都展現出強大火力，雲尼斯奧斯祖利亞同艾寧夏蘭特兩大神鋒交足功課，分別有4球同5球進帳，發揮入球機器本色。巴西崇尚進攻、挪威擅打反擊，為晉級肯定落力鬥攻，火花勢必由頭噴到尾，1.5球半場大值得捧場。（Viu TV 99、Now 618及616周一凌晨4時直播）

巴西近年表現一直低迷，決賽周冇幾多人睇好佢哋，不過自從世盃開始，球隊演出穩步上揚，分組賽首戰打和摩洛哥後，連續大炒海地、蘇格蘭，以及上場絕殺日本，狀態冒升兼士氣高昂。雲尼斯奧斯作為主要進攻點，佢嘅犀利突破近乎「屈機」，4個入球盡顯功架；更令人驚喜嘅係，加比爾馬天尼利、馬菲奧斯根夏同拉恩域陀等「綠葉」前鋒，都可以恰如其分咁發揮作用，令巴西鋒力大增。

森巴領隊安察洛堤經驗豐富，往往能夠針對對手弱點展開猛烈進攻，希望能夠盡早拎到入球穩定局面，一班球員亦踢得好搶韁，趁對手未企穩陣腳搶到入波。巴西最近6場賽事，有5場半場總入球開2球或以上，最終亦取得5勝1和成績。既然搶攻踢法成效咁高，安察洛堤今場當然會照辦煮碗。

挪威唔會龜縮照搶攻
挪威相隔28年後再闖世盃16強，當年佢哋就係喺分組賽擊敗巴西先至晉級，今屆能夠殺入16強已經光榮完成目標，今場可望放開懷抱再爭佳績。挪威有夏蘭特、馬田奧迪加特、安東尼奧努沙同阿歷山大索洛夫4位攻擊好手，而且擅於反擊，一個簡單長傳已經可以靠夏蘭特「無中生有」，巴西防線未必頂得住。挪威就算對住實力更強對手，都絕少龜縮死守，有機會就全力爭取入球，今屆4場賽事都可以喺上半場入波，有力擊破巴西防線，開1.5球半場大機會高。

三獅飄忽撐墨國先破網
上圈驚險晉級嘅英格蘭，16強將作客今屆3支主辦國之一嘅墨西哥。「三獅兵團」上場反勝剛果民主共和國可謂大話夾好彩，防線漏洞表露無遺；反觀墨西哥由揭幕戰至今，球員表現超水準，加上高海拔主場威力，英軍肯定難打，留意到墨西哥踢法急進，近8場7次先入波，撐主隊「第一隊入球」屬信心之選。（Now 618、616及馬會指定場外投注處周一早上8時直播）

海拔2,200米開戰
墨西哥係今屆3支主辦國當中實力最強1隊，佢哋今屆表現拍得住兩支爭標熱門法國同阿根廷，揭幕戰至今4戰全勝，攻入8球不失1球，祖利安基洛尼斯累積3球、魯爾占美尼斯2球，路爾斯洛慕、艾華路費度高同馬迪奧查維斯各入1球，攻力強勁兼火力分散，令對手防不勝防，今仗繼續喺海拔超過2,200米嘅墨西哥城主場出擊，佔盡天時地利人和，值得重視。

反觀星光熠熠嘅英格蘭演出反覆，分組賽先同克羅地亞上演入球騷，最終贏4比2，其後遭加納悶和，對巴拿馬亦僅贏2比0，上仗32強對剛果民主共和國幾乎出事，喺出局邊緣靠隊長哈利卡尼一個救全家驚險反勝，咁「海鮮波」嘅演出實在難令人放心。

英軍現時最大問題係後防不穩，上場對民主剛果首個失球就係右閘出現重大漏洞，但傷兵問題可能繼續焗用迪積史賓斯，墨西哥肯定會弱點攻擊，英格蘭先失守不足為奇。