[东方报]世界盃：神鋒三重奏鬥數胡[06-22]

世盃上演「神鋒三重奏」，美斯、基利安麥巴比、艾寧夏蘭特首輪都狂數胡入波，協助所屬球隊旗開得勝。阿根廷、法國、挪威今輪同日分途出擊，呢3位射手勢必再次大開殺戒，盡炒對手，為爭奪金靴獎增添籌碼。

夏蘭特孭飛挪威恃勢搶W
被視為今屆世盃奇兵嘅挪威，喺I組次輪撲擊塞內加爾。挪威首仗4比1大炒伊拉克盡展強大火力，艾寧夏蘭特首次喺世盃登場即入2球，有佢在陣已經係入球保證；塞內加爾防守力麻麻，頂唔住挪威嘅猛火，主勝捧得過。（Viu TV 99、Now 618、616及馬會指定場外投注處周二早上8時直播）

塞內加爾名大於實
挪威近年極速起飛，喺歐國聯同世盃外都拎到佳績，艾寧夏蘭特、馬田奧迪加特加上翼鋒安東尼奧努沙大放異彩，實力強橫、攻守兼備，唔計熱身賽，最近9場正式賽事錄得全勝，士氣高昂，有力再贏一場。

塞內加爾上場1比3輸畀法國，面對技術型球隊明顯輸蝕，雖然攻擊線有唔少星級球員，但尼高拉斯積遜、伊斯美拿沙亞等前鋒把握力弱，佢哋喺決賽周前嘅熱身賽，先後2比3輸畀美國同0比0悶和沙特阿拉伯，表現畀唔到人信心。挪威主勝放心捧場。