[东方报]世界盃：逼搶打法狂轟澳洲美國大無畏[06-19]

今晚世盃免費波有D組次輪賽事，東道主之一美國迎戰澳洲。美國主帥普捷天奴崇尚逼搶打法，射手科拿連巴洛根於首輪省兩粒弗到震，不過大軍壓得太上，隨時暴露更多空位畀「袋鼠國」打反擊，今仗捧2.5球大盤最上算。（Viu TV 99、Now 618及616周六凌晨3時直播）

美國在主帥普捷天奴帶領下，將以往執教熱刺時標誌式逼搶打法植入球隊，極具侵略性，佢特別鍾意趁對手陣腳未穩下，發動急攻圖盡快取得領先優勢。以美國首輪大勝巴拉圭4比1之役為例，上半場已經領先3比0，箭頭科拿連巴洛根梅開二度腳風奇順，攻擊重心基斯甸普列錫更喺左路話過就過，雖然「肥普」話呢位愛將有小傷，下半場立即換走佢，但既然遙遙領先，畀普列錫早啲休息，留力今仗冇壞。

袋鼠兵團靠快速突擊搵食
另邊廂，澳洲首輪同樣贏波，憑伊蘭觀達及干拿麥卡菲各建一功，爆冷以2比0擊敗土耳其，信心大增。儘管美國嘅逼搶打法係好睇，逼到對手有氣冇碇抖，但陣形壓得太前，難免令防線暴露更多空位，睇番佢哋近8仗場場有失波，其中7次開3球或以上，防守唔太穩陣，呢點正正啱晒「袋鼠國」打快速突擊。雙方上年曾經在熱身賽碰頭，美國險勝2比1，預計今仗都係大手交易。