[东方报]歐國聯：鋒線撻着左右開弓 英格蘭閃擊戰捷克[09-29]

歐國聯A3組第2輪，英格蘭作客捷克。「三獅兵團」上仗半場領先2比1下，最終倒輸2比3，錯失擊敗西班牙機會，不過鋒線左右開弓，已經展示實力，今仗對同組實力最弱嘅捷克，贏波冇問題，英軍近6仗作客5次半場領先，半場客勝屬信心之選。（周三凌晨2時45分開賽）

英格蘭上仗激鬥西班牙，英軍開賽先失波之下，未完半場已憑安東尼哥頓及哈利卡尼建功反超前2比1，下半場初段英軍獲得12碼，如果射入拉開比數，大有機會擊敗該支世盃盟主，兼一雪2024年歐國盃決賽落敗之仇，可惜射手哈利卡尼12碼「宴客」，搞到球隊陣腳大亂，最後輸埋。

「三獅兵團」今仗再上征途，領隊杜曹喺個別位置作出調整，包括1號門將比克福特復任正選，雙防中改用占士加拿同阿歷斯史葛，最重要係進攻鐵三角哈利卡尼、安東尼哥頓同布卡約沙卡維持不變，今仗可望繼續數胡。

捷克未習慣踢控傳
捷克今屆歐國聯「升班」，不過首輪主場對克羅地亞輸1比2。球隊自從世盃小組3戰僅得1分出局後，原領隊古碧克落台，捷克足總聘請西班牙籍丹尼亞執教，亦係球隊自1994年獨立參賽以來，首位外籍主帥，比賽風格同戰術亦隨即大變，由機動體力化改踢西班牙式控傳，將帥需要時間磨合，相信短期內難望反彈，對住急於求勝嘅英格蘭，相信半場都頂唔住。