[东方报]友誼賽：阿仙奴有前冇後等睇入球騷[08-09]

今晚上演一年一度嘅酋長盃，由東道主阿仙奴迎戰多蒙特。由於新一季快將開打，大家都想盡快谷起狀態唔會hea踢，不過阿仙奴「拍跳」入得又失得，兩隊今場好大機會合演入球騷。（周日晚9時開賽）

由於世盃踢到7月中先完，對擁有好多國腳嘅球隊備戰新球季點都有影響，好似阿仙奴之前只係踢咗兩場熱身賽，先大炒基羅納四個一皮，上仗對貝迪斯就輸1比3，唔單止仲放緊假嘅大衞拉耶等西班牙國腳，就算係加比爾馬加希斯、加比爾馬天尼利等都係歸隊冇耐，明顯未上力，但下周日就要出戰社區盾鬥曼城，再多幾日後英超開咧戰對高雲地利，新球季殺到埋身，一定要把握機會催谷狀態。

多蒙特拍跳唔hea踢
多蒙特好少少，德甲月尾先開鑼，佢哋之前踢咗4場熱身賽，只得2勝2負，包括日本之旅先輸畀大阪櫻花，再小勝FC東京1比0，表現未太理想，主帥尼高高華都唔多滿意，今仗造訪阿仙奴係時候踢番好啲，唔會hea踢。不過考慮到兩隊都未齊腳，尤其係阿仙奴有主力後衞祖利安添巴同威廉沙列巴仲養緊傷，防守唔多穩陣，而且「拍跳」例入得又失得，近4場熱身賽3次開4球或以上，今仗隨時以攻代守，實多波入。