[东方报]世界盃：歐洲紅魔特蘭加雄獅 同時覺醒鬥數胡[07-01]

兩支風格完全唔同嘅球隊喺32強展開對碰，隊中充滿天才嘅比利時，對體力充沛嘅塞內加爾。雙方喺最後一場分組賽齊齊「覺醒」，狂轟對手5球，預料今場將會係一場娛樂性豐富嘅鬥攻比賽，加上塞內加爾近6戰，5次開4球或以上，2.5球嘅入球大相當穩陣，有興趣博賠率嘅朋友，可以玩埋3.5球嘅入球大博起孖。（Now 618及616周四凌晨4時直播）

比利時同塞內加爾都係最後一場分組賽贏波，確保自己淘汰賽資格，不過「歐洲紅魔」係1勝2和入6球失2球，以G組首名出線，相反塞內加爾1勝2負入8球失6球，僅以3分成為最低分嘅最佳第3名。

兩軍中前場狀態可以話及時操起，齊齊喺最後一場射入對手5球，今仗即使係一場過淘汰賽，相信好大機會係對攻局面。「歐洲紅魔」擁有奇雲迪布尼同泰利文斯控制球賽節奏，李安度杜沙特同謝利美杜古活力十足，尤其後者陪完老婆生仔歸隊，成支比利時生晒，如果軟嘅唔得，後備席仲有盧卡古出嚟衝，要撞散鬆散嘅塞加內爾後防唔難。

塞內加爾中前場都猛將如雲，沙迪奧文尼、伊斯美拿沙亞同班巴迪安都有超卓射門觸覺，今屆賽事更彈起埋柏比古爾，呢名維拉利爾中場已經射入2球，據報曼聯已經報價4,500萬鎊進行收購。

文迪膝傷遇強易出事
可惜「特蘭加雄獅」防守唔掂，原本一夫當關嘅門將艾度亞文迪膝傷今場會缺陣，而且佢哋對強隊守唔住，分組賽對法國及挪威分別輸1比3及2比3，近6場有5次開4球或以上，踢法大開大合之下，面對比利時肯定開入球騷，2.5球大相當穩陣。