[东方报]世界盃：急先鋒美國 半大尼料[07-01]

世盃東道主美國今屆表現出色，以小組首名晉級淘汰賽，32強迎戰波斯尼亞不勝無歸！美國今屆喺主場氣勢下，踢法非常進取，經常可以早早打開紀錄，要攻破防守能力麻麻嘅波斯尼亞唔使好耐時間，今場寧願博1.5球嘅半場大。（Now 618、616及馬會指定場外投注處周四早上8時直播）

波斯尼亞陣容頭重腳輕
美國喺決賽周前成績麻麻，後防經常守唔住，場場都有失波，不過領隊普捷天奴喺分組賽調整打法，實行以攻代守，藉主場氣勢先下手為強。首戰4比1大破巴拉圭已贏盡掌聲、第2輪以2比0輕取澳洲，上場喺收起大部分主力情況下，仍然喺早段取得領先，最終被土耳其絕殺輸波，但3戰2勝足夠令美國拎到小組首名。

美國今屆最大特點是踢法爽朗，科拿連巴洛根、列卡度柏比等前鋒侵略性極強，往往可以喺對手未企穩陣腳下搵到食，而且王牌基斯甸普列錫已經傷愈，令美國鋒線再添火力。美國今屆8個入波，有6球喺上半場產生，連同世盃前嘅熱身賽，美國已經連續5場賽事，半場總入球全開2球或以上。

波斯尼亞喺分組賽1勝1和1負，佢哋3場賽事有2場先拔頭籌，但係防守力唔合格，畀對手入咗6球。老將迪斯高傷愈復出，令波斯尼亞火力大增，加上新星阿拉積比高域冒起，簡單直接嘅進攻相當奏效，今場會趁美國強攻伺機反擊，開1.5球嘅半場大機會高。