[东方报]英足盃：溫布萊決賽強陣出擊曼城搶盃霸氣路[05-16]

英格蘭足總盃決賽今晚於溫布萊開Show！今季已經捧走英聯盃冠軍嘅曼城，將同勢頹嘅車路士爭逐錦標，繼續向「3冠王」美夢進發。曼城季尾衝刺全面撻着，一眾攻擊球員狀態巔峰，相反車路士一沉不起，就算換埋領隊都冇起色，今場阻唔到「藍月亮」登基，熱捧客勝。（Now 651周六晚10時直播）

曼城喺英超爭霸仲未絕望，但係盃賽「雙冠」近在咫尺，佢哋今季喺盃賽順風順水，英聯盃5連勝奪冠，每場都贏至少2球；今屆英足盃亦5連勝打入決賽，5場賽事攻入21球，霸氣十足。曼城已經連續4年殺入英足盃決賽，而且對住車路士贏多輸少，近5次正式比賽交鋒4勝1和，再贏冇難度。

態沉車仔漏洞百出
踏入季尾，曼城勢如破竹，近9場賽事贏8場，挪威射手艾寧夏蘭特重拾射門鞋、翼鋒謝利美杜古亦愈戰愈勇，頻頻射入關鍵入球，上場聯賽3比0炒水晶宮，就連菲爾科頓同沙雲奴都「翻生」，據報西班牙中場洛迪卡斯簡迪亦有機會復出，球隊陣容相當齊整。

褪色豪門車路士同曼城剛好相反，季尾表現直插谷底，近11場賽事只贏過2場，當中有8場輸波，僅有嘅2場勝仗就係英足總贏維爾港同列斯聯，面對實力更強嘅對手即被打爆。

車路士將前主帥羅仙尼亞炒魷，換上麥法蘭領軍都冇太大分別，防守依然漏洞百出，球場上單靠個別球員質素去支撐，今場對住如日方中嘅曼城，恐怕難以招架。