[东方报]熱身賽：曼聯捧盃在望嗒晒糖[08-03]

曼聯「英超夏季系列賽」尾場出戰愛華頓，「紅魔鬼」開操後備戰態度非常認真，今次「英超夏季系列賽」2戰2勝，連續擊敗兩支英超球隊韋斯咸同般尼茅夫，合共攻入6球，狀態及鬥心一流，加上新簽射手麥比奧莫有望首次披甲，鋒線人腳更加鼎盛，勢必強攻對手。翻查兩軍近7次對賽，曼聯取得6勝1和，有力再下一城，贏波捧盃。（Now 621周一凌晨5時直播）

「英超夏季系列賽」4隊踢單循環，曼聯2勝有6分，領先韋斯咸、般尼茅夫3分，今場打和都可以奪冠。但「紅魔鬼」既然已經操起狀態，仲愈戰愈勇，當然唔好畀佢停，勢必乘勝追擊，保持士氣迎接新球季。

事實上，從曼聯近兩場表現可見，球員都非常落力，海倫上場亦入波，打破近3個月入球荒。馬菲奧斯根夏同麥比奧莫加盟後，鋒線正選位置競爭非常激烈，有得上陣肯定搏命爭取表現。領隊魯賓艾摩廉早前透露，以6,500萬鎊（約6.8億港元）轉會費由賓福特來投嘅麥比奧莫，今仗應該可以上陣，令球隊如虎添翼，愛華頓防線難以招架。

拖肥糖冇態擋唔住
至於「拖肥糖」喺今次「英超夏季系列賽」2戰2敗，包括以0比3大敗於般尼茅夫腳下，踢4場熱身賽錄得1和3負差劣成績，成班球員完全不在狀態，領隊莫耶斯仲要時間調整陣容，無辦法相提並論，好大機會又會再輸1場。