[东方报]熱身賽：阿仙奴蓄銳誓破A米[07-23]

亞洲之旅首站新加坡獻技
阿仙奴亞洲之旅首站，周三晚喺新加坡展開，將會同意甲勁旅AC米蘭交鋒。今仗係兩大名牌首場季前熱身賽，狀態有待提升，不過阿仙奴嘅備戰似乎更加充足，而且多位新星已磨拳擦掌等住大顯身手，今場可以秤高一線，主勝有計！（Now 633周三晚上7時30分直播）

今場係阿仙奴夏天首場正式熱身賽，但球隊其實喺月初已經開操，而且之前拉隊去西班牙進行近1星期集訓，集中提升體能同耐戰力，上周亦踢咗場非正式嘅閉門熱身賽，2比0擊敗英冠球會屈福特，夏維斯同賓韋特分別入波，顯示球隊狀態進度相當理想。

阿仙奴特意喺出發亞洲前，完成蘇比文迪、基斯甸洛加特及阿列沙巴拿加等收購，3位新兵有望喺今場處子上陣，戰鬥力有保證。布卡約沙卡、迪格蘭賴斯及威廉沙列巴等主力悉數候命，阿仙奴嘅戰鬥力好有保證，各方面似乎都比AC米蘭佔優。

紅黑兵團失兩將戰力受削
另邊廂，AC米蘭今夏換班，新帥阿里基上任，但亦失去雷恩達斯及迪奧靴南迪斯等主力，重新適應需時，而且夏天重點簽約嘅莫迪歷，因為踢完世冠盃要休息，並冇隨隊東訪，令「紅黑兵團」戰鬥力再受削弱。睇番阿仙奴近3次對AC米蘭，全部都順利奏凱，今仗有望再贏一場。