[东方报]世冠盃：法林明高弗到漏對攻拜仁[06-29]

世冠盃同日另一場矚目大戰，法林明高硬撼拜仁慕尼黑。拜仁雖然實力強橫，上場涉嫌走線輸畀賓菲加之前，6勝3和保持不敗，但法林明高同樣好弗，近11場8勝3和，實行同對手對攻，今場有望上演入球騷，2.5球入球大抵玩到爛。（周一凌晨4時開賽）

少帥菲臘路爾斯有料到
今屆世冠盃4支巴西兵表現出色，法林明高喺D組以2勝1和成為榜首，當中落後1球下反勝車路士3比1，證明有力同歐洲列強一戰。事實上法林明高踢世冠盃前，喺巴甲排緊榜首，連同世冠盃在內近11場8勝3和，教練菲臘路爾斯球員時代喺歐洲球壇打滾，效力車路士同馬德里體育會期間，曾贏過英超、西甲、歐霸盃同歐超盃。呢位少帥將歐洲風格注入法林明高，中場壓迫戰術做得淋漓盡致，當中烏拉圭中場迪阿拉斯卡達表現可圈可點。

拜仁最尾一場分組賽留力，今場實擺出最強陣容，除咗哈利卡尼、穆斯亞拿同甘美治外，米高奧利斯喺今屆世冠盃更搶鏡，個人創造6個士哥（3入球及3助攻），除領先射手榜，亦有指佢係今屆ＭＶＰ大熱人選。拜仁上場懷疑走線而輸波，其實佢哋全面控制球賽，控球率高達73％，更有13次射門，預期入球值2.24，今場只要發揮正常，唔難取得入球。

睇番法林明高今屆賽事犯規達46次，除好易輸12碼，亦有機會食紅黃牌，咁就益晒拜仁。拜仁近10場8次開3球或以上，入球大係不二之選。