[东方报]世冠盃：生死戰唔輸就掂 車仔穩陣波力保優細[06-24]

世冠盃D組第3輪生死戰，艾斯柏蘭斯對車路士，兩隊首兩輪1勝1負同得3分，英超勁旅車路士暫以較佳得失球佔先，今場正面交手，車路士只要唔輸就可晉級，突尼西亞球隊艾斯柏蘭斯則非勝不可，形勢上對車路士有利，佢哋踢法本來就保守，依家咁嘅環境更加唔會太進取，相信今場難有交收，2.5球入球細穩陣。（周三早上9時開賽）

車路士上輪喺領先情況下連失3球，以1:3不敵法林明高，更有前鋒尼高拉斯積遜出「收山腳」被直接紅牌趕出場，今場停賽，進攻陣容唔完整之下，更加需要做好防守，何況馬利斯卡執教嘅「藍戰士」一向都守強攻弱，近7場5次開2球或以下，當中4場保持不失球，今場生死戰要守住艾斯柏蘭斯，應該唔難。

再睇車路士前鋒線，22歲前鋒利安戴納新加盟球隊就立即參加今屆世冠盃，無疑係急咗啲，一來佢經驗尚淺，二來融入球隊踢法需要時間，想搵到「上車」後首個入球並唔容易。

艾斯柏蘭斯攻力疲弱
至於突尼西亞球隊艾斯柏蘭斯，佢哋本身並非攻擊型球隊，入波1球起兩球止，上輪對FC洛杉磯亦只能小勝1比0，以佢哋疲弱攻力，要攻破「車仔」鐵桶防線相當困難，不過反過來佢哋防守表現唔差，首輪對住狀態勇銳嘅法林明高，全力防守下只係輸0比2，今場對住同屬防守型嘅車路士，睇怕悶戰居多。