[东方报]世冠盃：捷禾地標振聲威 撐國米速破蒙特雷[06-17]

世冠盃E組，蒙特雷火併國際米蘭，歐聯亞軍國米剛換帥，聘請捷禾回巢執教，呢位44歲羅馬尼亞名宿首仗領軍出擊，必然希望打響頭炮，以鞏固帥位及建立聲望，預料會採取主攻踢法，先下手為強。加上國際米蘭各項賽事，近6場有5次上半場領先，一於直取半場客勝。（周三早上9時開賽）

曾教藍黑青年軍熟晒路
國際米蘭失落歐聯錦標後，領軍4年嘅教練施蒙尼恩沙基離隊，轉投希拉爾，會方搵嚟名宿捷禾接任。雖然呢位少帥教波經驗尚淺，但佢喺球員時代曾經效力「藍黑兵團」7年，亦教過青年軍，直至上年先至離開，對呢支意甲勁旅非常熟悉，唔需要特別花時間磨合。事實上，捷禾今年2月臨危受命執教帕爾馬，協助球隊成功護級，尤其是季尾面對數支強隊，都搶到分，可見佢應變能力強，加上國米保留原有人腳陣容，應可延續近年強勢。

至於墨西哥球隊蒙特雷近年推行「星戰策略」，簽入前皇馬隊長沙治奧拉莫斯、前貝迪斯中場簡拿尼斯、前西維爾射手奧甘波斯等曾於歐洲球壇征戰嘅名將，無可否認，佢哋嘅大賽經驗有助蒙特雷應付世冠盃，問題係呢班過氣球星始終年紀比較大，恐怕難以招架當打嘅國際米蘭球員。加上蒙特雷防線不穩，近2場合共失4球，隨時上半場都守唔住國米。